କରୋନା ମୁକାବିଲା ପାଇଁ ରାଜ୍ୟରେ ୧୦୦୦ ଆଇସୋଲେସନ୍ ବେଡ୍ କରିବେ କିମ୍ସ୍ ଓ ସମ୍ ହସ୍ପିଟାଲ୍

ଭୁବନେଶ୍ୱର: କରୋନା ଭୂତାଣୁ (କୋଭିଡ୍‌-୧୯) ସଂକ୍ରମଣ ସଂଖ୍ୟା ଦେଶରେ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ଘରୋଇ ହସ୍ପିଟାଲ ସହାୟତାରେ କରୋନା ଆକ୍ରାନ୍ତ ରୋଗୀଙ୍କ ପାଇଁ ୧ ହଜାର ବେଡ୍‌ ହସ୍ପିଟାଲ ଆୟୋଜନ କରିଛନ୍ତି। ଏ ନେଇ ସରକାର, ସମ୍‌ ଓ କିମ୍ସ ମେଡିକାଲ କଲେଜ ମଧ୍ୟରେ ତ୍ରିପାକ୍ଷିକ ବୁଝାମଣା ପତ୍ର (ଏମ୍‌ଓୟୁ) ସ୍ବାକ୍ଷରିତ ହୋଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ଗୁରୁବାର ଲୋକସେବା ଭବନଠାରେ ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ସଚିବ ନିକୁଞ୍ଜ ବିହାରୀ ଧଳ, ଓଡ଼ିଶା ଖଣି ନିଗମର ପରିଚାଳନା ନିର୍ଦ୍ଦେଶକ ଭିନିଲ କ୍ରିଷ୍ଣା ଏବଂ କିମ୍ସ ମ୍ୟାନେଜମେଣ୍ଟ ସହିତ ୪୫୦ ଶଯ୍ୟା ବିଶିଷ୍ଟ ଏକ ହସ୍ପିଟାଲ ପାଇଁ ବୁଝାମଣା ପତ୍ର ସ୍ବାକ୍ଷରିତ କରିଛନ୍ତି। ସେହିପରି ଦ୍ୱିତୀୟ ଏମ୍‌ଓୟୁରେ ସ୍ବାସ୍ଥ୍ୟ ସଚିବ, ଏମ୍‌ସିଏଲ୍‌ର ଏସ୍‌.ଏସ୍‌. ପଣ୍ଡା ଏବଂ ସମ୍‌ ହସ୍ପିଟାଲ ମ୍ୟାନେଜମେଣ୍ଟ ୫୦୦ ଶଯ୍ୟା ବିଶିଷ୍ଟ ହସ୍ପିଟାଲ ଏବଂ ଆଇସିୟୁ ସୁବିଧା କରିବା ନେଇ ସ୍ବାକ୍ଷରିତ କରିଛନ୍ତି। ଉକ୍ତ କୋଭିଡ୍‌-୧୯ ହସ୍ପିଟାଲ ପାଇଁ ଓଏମ୍‌ସି ଏବଂ ଏମ୍‌ସିଏଲ୍‌ କର୍ପୋରେଟ ସାମାଜିକ ଉତ୍ତରଦାୟିତ୍ୱ ପାଣ୍ଠି (ସିଏସଆର) ସମସ୍ତ ଖର୍ଚ୍ଚ ବହନ କରିବେ। ଏହା ଆସନ୍ତା ୧୫ଦିନ ମଧ୍ୟରେ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟକ୍ଷମ ହେବ। ସମଗ୍ର ଦେଶରେ ୧ ହଜାର କୋଭିଡ୍‌-୧୯ ରୋଗୀଙ୍କ ପାଇଁ ହସ୍ପିଟାଲ ବ୍ୟବସ୍ଥା କରିବାରେ ଓଡିଶା ହେଉଛି ପ୍ରଥମ ରାଜ୍ୟ। ଏ ନେଇ ମୁଖ୍ୟମନ୍ତ୍ରୀ ଏହି ଦୁଇ ରାଜ୍ୟ ଓ କେନ୍ଦ୍ର ଉଦ୍ୟୋଗକୁ ସହଯୋଗ ପାଇଁ ସ୍ବାଗତ କରିଛନ୍ତି।
କରୋନା ଭୂତାଣୁ ସାରା ଦେଶରେ କାୟା ବିସ୍ତାର କରିଥିବାବେଳେ ଓଡ଼ିଶାକୁ ମଧ୍ୟ ପ୍ରଭାବିତ କରିଛି। ଆମେରିକା ଓ ଇଟାଲି ଭଳି ବିକଶିତ ଦେଶରେ ଉନ୍ନତ ସ୍ବାସ୍ଥ୍ୟସେବା ଥିବା ସତ୍ତ୍ୱେ ସେମାନେ ମଧ୍ୟ ଏହି ରୋଗକୁ ମୁକାବିଲା କରିବାରେ କଠିନ ପରିସ୍ଥିତିର ସମ୍ମୁଖୀନ ହେଉଛନ୍ତି। ଏଥିପାଇଁ ତ୍ୱରିତ୍‌ ବେଗରେ ସ୍ବାସ୍ଥ୍ୟ ବିଭାଗକୁ ସୁଦୃଢ଼ କରିବା ସହ କରୋନା ରୋଗୀ ଓ ସନ୍ଦିଗ୍ଧଙ୍କୁ ସେବା ଯୋଗାଇବା ପାଇଁ ରାଜ୍ୟ ସରକାର ଏଭଳି ସ୍ବତନ୍ତ୍ର ପଦକ୍ଷେପ ନେବା ଆରମ୍ଭ କରିଛନ୍ତି। ଏ ଦିଗରେ ରାଜ୍ୟ ସରକାର କରୋନା ମହାମାରୀକୁ ମୁକାବିଲା କରିବା ଲାଗି ଅନେକ ପଦକ୍ଷେପ ଗ୍ରହଣ କରିଛନ୍ତି । ରାଜ୍ୟର ଅନ୍ୟ ଭାଗରେ କରୋନା ରୋଗୀଙ୍କ ପାଇଁ ଏଭଳି ବ୍ୟବସ୍ଥା କରିବା ସକାଶେ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। ଏହି ଏମ୍‌ଓୟୁ ବେଳେ ଏମ୍‌ପି ଅଚ୍ୟୁତ ସାମନ୍ତ, ମୁଖ୍ୟ ଶାସନ ସଚିବ ଅସିତ୍‌ ତ୍ରିପାଠୀ, ଓଏମ୍‌ସି ଚେୟାରମ୍ୟାନ, ମୁଖ୍ୟନ୍ତ୍ରୀଙ୍କ ଉପଦେଷ୍ଟା, ମୁଖ୍ୟମନ୍ତ୍ରୀ ସଚିବ (୫ଟି) ଏବଂ ସୋଆ ବିଶ୍ୱବିଦ୍ୟାଳୟର କୁଳପତି ଉପସ୍ଥିତ ଥିଲେ।

Leave a Reply

Your email address will not be published. Required fields are marked *