ନକଲି ସିମ୍ କିଣିଲେ କିମ୍ବା ବିକିଲେ ଭୋଗିବେ ଜେଲ ଦଣ୍ଡ, ଜାଣନ୍ତୁ ନୂଆ ନିୟମ

ନୂଆଦିଲ୍ଲୀ: ସରକାର ଦେଶରେ ନକଲି ସିମ୍ କାର୍ଡ ମାଧ୍ୟମରେ ଠକେଇ ଏବଂ ଅନ୍ୟାନ୍ୟ ସମାନ ଅପରାଧ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଯାଉଛନ୍ତି। ଟେଲିକମ୍ ବିଲ୍ ୨୦୨୩ ସଂସଦର ଉଭୟ ଗୃହରେ ପାରିତ ହୋଇଛି। ଏହି ବିଲରେ ନକଲି ସିମ୍ କିଣିବା ପାଇଁ ତିନି ବର୍ଷ ଜେଲ୍ ଏବଂ ୫୦ ଲକ୍ଷ ଟଙ୍କା ପର୍ଯ୍ୟନ୍ତ ଜୋରିମାନା ବ୍ୟବସ୍ଥା ରହିଛି। ରାଷ୍ଟ୍ରପତିଙ୍କ ମଞ୍ଜୁରୀ ପରେ ଏହି ବିଲ୍ ଆଇନରେ ପରିଣତ ହେବ।

ନୂଆ ଟେଲିକମ୍ ବିଲ୍ ୨୦୨୩ ଗତକାଲି ଲୋକସଭାରେ ପାରିତ ହୋଇଥିଲା ଏବଂ ଆଜି ରାଜ୍ୟସଭାରେ ମଧ୍ୟ ଅନୁମୋଦିତ ହୋଇଛି। ଏହି ବିଲ୍ ସରକାରଙ୍କୁ ଜାତୀୟ ସୁରକ୍ଷା କାରଣରୁ କୌଣସି ଟେଲିକମ୍ ସେବା କିମ୍ବା ନେଟୱାର୍କକୁ ଗ୍ରହଣ, ପରିଚାଳନା କିମ୍ବା ସ୍ଥଗିତ ରଖିବାକୁ ଅନୁମତି ଦେଇଥାଏ। ଜନସାଧାରଣଙ୍କ ସୁରକ୍ଷା ପାଇଁ ଆବଶ୍ୟକ ହେଲେ ସରକାର ଟେଲିକମ୍ ନେଟୱାର୍କରେ ବାର୍ତ୍ତା ଅଟକାଇବାରେ ସକ୍ଷମ ହେବେ। ଏହି ବିଲରେ ନକଲି ସିମ୍ କିଣିବା ପାଇଁ ତିନି ବର୍ଷ ଜେଲ୍ ଏବଂ ୫୦ ଲକ୍ଷ ଟଙ୍କା ପର୍ଯ୍ୟନ୍ତ ଜୋରିମାନା ମଧ୍ୟ ରହିଛି।

ଏହି ନୂଆ ବିଲ୍ ୧୩୮ ବର୍ଷ ପୁରୁଣା ଭାରତୀୟ ଟେଲିଗ୍ରାଫ ଅଧିନିୟମର ସ୍ଥାନ ନେବ। ଭାରତୀୟ ଟେଲିଗ୍ରାଫ ଅଧିନିୟମ ବର୍ତ୍ତମାନ ଟେଲିକମ୍ କ୍ଷେତ୍ରକୁ ପରିଚାଳନା କରୁଛି। ଏହି ବିଲ୍ ଇଣ୍ଡିଆନ୍ ୱେୟାରଲେସ୍ ଟେଲିଗ୍ରାଫ ଆକ୍ଟ, ୧୯୩୩ ଏବଂ ଟେଲିଗ୍ରାଫ ୱୟାର ଆକ୍ଟ, ୧୯୫୦ର ସ୍ଥାନ ନେବ। ଏହି ବିଲରେ ଟ୍ରାଇ ଆଇନ, ୧୯୯୭ରେ ମଧ୍ଯ଼ ସଂଶୋଧନ କରାଯିବ ।

ଏହି ବିଲରେ ଟେଲିକମ୍ କମ୍ପାନୀଗୁଡ଼ିକ ଗ୍ରାହକଙ୍କୁ ସିମ୍ କାର୍ଡ ପ୍ରଦାନ କରିବା ପୂର୍ବରୁ ବାୟୋମେଟ୍ରିକ୍ ପ୍ରମାଣିକରଣ କରିବା ବାଧ୍ୟତାମୂଳକ କରାଯାଇଛି । ଏହି ବିଲରେ, ଇ-କମର୍ସ, ଅନଲାଇନ୍ ମେସେଜିଂ ପରି ଓଭର-ଦ-ଟପ୍ ସେବା (ଓଟିଟି ପ୍ଲାଟଫର୍ମ) କୁ ଟେଲିକମ୍ ସେବାର ପରିଭାଷାରୁ ବାଦ ଦିଆଯାଇଛି।

ଗତ ବର୍ଷ ଯେତେବେଳେ ଟେଲି ଯୋଗାଯୋଗ ବିଲ୍ ଉପସ୍ଥାପନ କରାଯାଇଥିଲା, ସେତେବେଳେ ଓଟିଟି ସେବାକୁ ମଧ୍ୟ ଏଥିରେ ସାମିଲ କରାଯାଇଥିଲା, ଯାହା ଅନେକ ହଙ୍ଗାମା ସୃଷ୍ଟି କରିଥିଲା। ପରେ ସରକାର ଏହି ବିଲ୍ କୁ ପ୍ରତ୍ୟାହାର କରିନେଇଥିଲେ ।

ଏହି ବିଲ୍ ଲାଇସେନ୍ସିଂ ବ୍ୟବସ୍ଥାରେ ମଧ୍ୟ ପରିବର୍ତ୍ତନ ଆଣିବ। ବର୍ତ୍ତମାନ, ସେବା ପ୍ରଦାନକାରୀମାନଙ୍କୁ ବିଭିନ୍ନ ପ୍ରକାରର ସେବା ପାଇଁ ଅଲଗା ଲାଇସେନ୍ସ ନେବାକୁ ପଡ଼ିଥାଏ। କିନ୍ତୁ ଏହି ବିଲ୍ ଆଇନରେ ପରିଣତ ହେବା ମାତ୍ରେ ଲାଇସେନ୍ସିଂରେ ସମାନତା ଆସିବ।

ନୂଆ ଟେଲିକମ୍ ବିଲ୍ ରେ ଏହା ମଧ୍ୟ ବ୍ୟବସ୍ଥା ରହିଛି ଯେ ସାମଗ୍ରୀ ଏବଂ ସେବା ପାଇଁ ବିଜ୍ଞାପନ ଏବଂ ପ୍ରଚାର ବାର୍ତ୍ତା ପଠାଇବା ପୂର୍ବରୁ ଗ୍ରାହକଙ୍କୁ ସେମାନଙ୍କର ସମ୍ମତି ନେବାକୁ ପଡିବ। ଟେଲିକମ୍ ସେବା ପ୍ରଦାନକାରୀଙ୍କୁ ଏକ ଅନଲାଇନ୍ ବ୍ୟବସ୍ଥା ସୃଷ୍ଟି କରିବାକୁ ପଡିବ ଯାହା ଦ୍ୱାରା ବ୍ୟବହାରକାରୀ ମାନେ ସେମାନଙ୍କର ଅଭିଯୋଗ ଅନଲାଇନରେ ଦାଖଲ କରିପାରିବେ। ଏହି ବିଲରେ ଟେଲିକମ୍ ସ୍ପେକ୍ଟ୍ରମର ପ୍ରଶାସନିକ ଆବଣ୍ଟନ ପାଇଁ ବ୍ୟବସ୍ଥା ରହିଛି, ଯାହା ସେବା ପ୍ରଚଳନକୁ ତ୍ୱରାନ୍ୱିତ କରିବ।

ଏହି ଆଇନର ସମାଲୋଚକମାନେ କହିଛନ୍ତି ଯେ ଏହି ବିଲ୍ ଟ୍ରାଇକୁ କେବଳ ରବର ଷ୍ଟାମ୍ପ ଭାବରେ ଛାଡିଦେବ କାରଣ ଏହା ନିୟାମକଙ୍କ କ୍ଷମତାକୁ ଯଥେଷ୍ଟ ଦୁର୍ବଳ କରିଥାଏ । ଏହି ବିଲରେ ଟ୍ରାଇର ଅଧ୍ୟକ୍ଷ ପଦ ପାଇଁ ଘରୋଇ କ୍ଷେତ୍ରର କର୍ପୋରେଟ ଅଧିକାରୀମାନଙ୍କୁ ନିଯୁକ୍ତି ଦେବା ଲାଗି ମଧ୍ୟ ବ୍ୟବସ୍ଥା ରହିଛି । ଯାହା ଏକ ବିତର୍କ ଆରମ୍ଭ କରିପାରେ ।

ଏହି ନୂଆ ବିଲ୍ ଆମେରିକୀୟ ବ୍ୟବସାୟୀ ଏଲୋନ୍ ମସ୍କଙ୍କ ଷ୍ଟାରଲିଙ୍କ୍ ଭଳି ବିଦେଶୀ କମ୍ପାନୀମାନଙ୍କୁ ଲାଭାନ୍ୱିତ କରିବ ବୋଲି କୁହାଯାଉଛି।

Leave a Reply

Your email address will not be published. Required fields are marked *