Semicon India 2025: କେନ୍ଦ୍ର ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରୀ ଅଶ୍ୱିନୀ ବୈଷ୍ଣବ ଆଜି ସେମିକନ ଇଣ୍ଡିଆ 2025 ର ଉଦଘାଟନୀ ସମାରୋହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପ୍ରଥମ ମେଡ୍-ଇନ୍-ଇଣ୍ଡିଆ 32-ବିଟ୍ ପ୍ରୋସେସର୍ ଚିପ୍ ପ୍ରଦାନ କରିଛନ୍ତି। ଫଳରେ ସେମିକଣ୍ଡକ୍ଟର ଉତ୍ପାଦନରେ ଭାରତ ଏକ ଐତିହାସିକ ପଦକ୍ଷେପ ଗ୍ରହଣ କଲା।ଭାରତରେ ସେମିକଣ୍ଡକ୍ଟର ଉତ୍ପାଦନ ଉପରେ ଆଲୋକପାତ କରି ଶ୍ରୀ ବୈଷ୍ଣବ କହିଛନ୍ତି, “ଆଜି ପାଞ୍ଚଟି ସେମିକଣ୍ଡକ୍ଟର ୟୁନିଟ୍ ନିର୍ମାଣ ଦ୍ରୁତ ଗତିରେ ଚାଲିଛି। ଗୋଟିଏ ୟୁନିଟ୍ ର ପାଇଲଟ୍ ଲାଇନ ପୂର୍ବରୁ ସମ୍ପୂର୍ଣ୍ଣ ହୋଇସାରିଛି। ଆମେ ମାନ୍ୟବର ପ୍ରଧାନମନ୍ତ୍ରୀଙ୍କୁ ପ୍ରଥମ ମେଡ୍-ଇନ୍-ଇଣ୍ଡିଆ ଚିପ୍ ପ୍ରଦାନ କରିଛୁ। ଆଗାମୀ ମାସଗୁଡ଼ିକରେ ଆଉ ଦୁଇଟି ୟୁନିଟ୍ ଉତ୍ପାଦନ ଆରମ୍ଭ କରିବ। ଆଉ ପାଞ୍ଚଟି ଅତିରିକ୍ତ ୟୁନିଟ୍ ର ଡିଜାଇନ୍ କାମ ଅଗ୍ରଗତି କରୁଛି। ଚିପ୍ ନିର୍ମାଣ ପାଇଁ ଇକୋସିଷ୍ଟମ୍ ପାର୍ଟନରମାନେ ସମସ୍ତେ ଏଠାରେ ଅଛନ୍ତି ବୋଲି ସେ କହିଥିଲେ।ସେ ଜୋର ଦେଇ କହିଛନ୍ତି ଯେ ଭାରତ ଏକ ଅନିଶ୍ଚିତ ବିଶ୍ୱ ପରିବେଶରେ ସ୍ଥିରତାର ଏକ ଆଲୋକପଥ ଭାବରେ ଉଭା ହେଉଛି। “ଆମେ ଅଭୂତପୂର୍ବ ସମୟ ଦେଇ ଗତି କରୁଛୁ। ବିଶ୍ୱସ୍ତରୀୟ ନୀତିଗତ ଅସ୍ଥିରତା ବିରାଟ ଅନିଶ୍ଚିତତା ସୃଷ୍ଟି କରିଛି। ଏହି ଅସ୍ଥିର ସମୟରେ, ଭାରତ ସ୍ଥିରତା ଏବଂ ଅଭିବୃଦ୍ଧିର ଏକ ଆଲୋକସ୍ଥଳ ଭାବରେ ଠିଆ ହୋଇଛି ବୋଲି ଅଶ୍ବିନୀ ବୈଷ୍ଣବ କହିଥିଲେ।ମିଶନର ପ୍ରାରମ୍ଭିକ ଦିନଗୁଡ଼ିକୁ ମନେ ପକାଇ ମନ୍ତ୍ରୀ କହିଥିଲେ, “କିଛି ବର୍ଷ ପୂର୍ବେ, ଆମେ ପ୍ରଥମ ଥର ପାଇଁ ଏହି ନୂତନ ପ୍ରକଳ୍ପ ଆରମ୍ଭ କରିବା ପାଇଁ ଏକାଠି ହୋଇଥିଲୁ। ଆମର ପ୍ରଧାନମନ୍ତ୍ରୀଙ୍କ ଦୂରଦୃଷ୍ଟି ଦ୍ୱାରା ପରିଚାଳିତ ହୋଇ ଆମେ ଭାରତ ସେମିକଣ୍ଡକ୍ଟର ମିଶନ ଆରମ୍ଭ କରିଥିଲୁ। ଆମେ ବିଶ୍ୱସ୍ତରୀୟ ପ୍ରସିଦ୍ଧ ଶିଳ୍ପପତିମାନଙ୍କ ସହିତ ଆଲୋଚନା କରିଥିଲୁ। ସେମାନଙ୍କୁ ଏକାଠି କରି କାର୍ଯ୍ୟାନ୍ୱୟନ ଉପରେ ଯାତ୍ରା ଆରମ୍ଭ କରିଥିଲୁ। ଆଜି ଆମେ ଏଠାରେ ଅଛୁ – ମାତ୍ର ସାଢ଼େ ତିନି ବର୍ଷ ମଧ୍ୟରେ – ବିଶ୍ୱ ଆତ୍ମବିଶ୍ୱାସର ସହିତ ଭାରତକୁ ଦେଖୁଛି ବୋଲି ସେ କହିଛନ୍ତି।