ଭୁବନେଶ୍ବର : କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ରାଷ୍ଟ୍ରମନ୍ତ୍ରୀ ଶ୍ରୀମତୀ ରକ୍ଷା ନିଖିଲ ଖଡ଼ସେ ଆଜି ଜଗତପୁରସ୍ଥିତ ଭାରତୀୟ କ୍ରୀଡ଼ା ପ୍ରାଧିକରଣ (ସାଇ), ଜାତୀୟ ଉତ୍କର୍ଷ କେନ୍ଦ୍ର (ଏନସିଓଇ) ପରିଦର୍ଶନ କରିଛନ୍ତି। ଏହି ଅବସରରେ ଜଗତପୁରସ୍ଥିତ ଜାତୀୟ ଉତ୍କର୍ଷ କେନ୍ଦ୍ରର ସଫଳତାକୁ ରାଷ୍ଟ୍ରମନ୍ତ୍ରୀ ଶ୍ରୀମତୀ ଖଡ଼ସେ ପ୍ରଶଂସା କରିଥିଲେ, ଯାହାକି କାୟାକିଂ, କାନୋଇଙ୍ଗ ଏବଂ ରୋଇଂରେ ପରମିନ୍ଦର ସିଂହ, ପି. ରୋଜି ଦେବୀ, ଏଲ୍. ନେହା ଦେବୀଙ୍କ ପରି ଅନ୍ତର୍ଜାତୀୟ ଆଥଲେଟ୍ ଏବଂ ଚାମ୍ପିୟନମାନଙ୍କ ବିକାଶ ପାଇଁ ଏକ ଗୁରୁତ୍ୱପୂର୍ଣ୍ଣ କେନ୍ଦ୍ର ଭାବେ ଉଭା ହୋଇଛି।ନିକଟରେ ଅନୁଷ୍ଠିତ ଏସୀୟ କ୍ରୀଡ଼ା ଓ ପାରା ଏସୀୟ କ୍ରୀଡ଼ାରେ କ୍ରୀଡ଼ାବିତଙ୍କ ଉଲ୍ଲେଖନୀୟ ପ୍ରଦର୍ଶନକୁ ପ୍ରତିରକ୍ଷା ରାଷ୍ଟ୍ରମନ୍ତ୍ରୀ ନିଖିଲ ଖଡ଼ସେ ପ୍ରଶଂସା କରିଥିଲେ। ଏହାର ଶ୍ରେୟ ଏହି ସମ୍ମାନଜନକ କେନ୍ଦ୍ରରେ ପ୍ରଦାନ କରାଯାଉଥିବା କୋଚିଂ ପଦ୍ଧତି ଓ ଅତ୍ୟାଧୁନିକ କ୍ରୀଡ଼ା ବିଜ୍ଞାନ ସହାୟତାକୁ ଯାଉଛି ବୋଲି ସେ କହିଥିଲେ।ଶ୍ରୀମତୀ ରକ୍ଷା ଖଡ଼ସେ କହିଥିଲେ ଯେ ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟି ସମ୍ପନ୍ନ ନେତୃତ୍ୱରେ ଦେଶରେ କ୍ରୀଡ଼ା କ୍ଷେତ୍ରରେ ଅଭୂତପୂର୍ବ ବିକାଶ ଘଟୁଛି । ‘ଖେଲୋ ଇଣ୍ଡିଆ’ ଭଳି ବୈପ୍ଳବିକ ପଦକ୍ଷେପ ଯୁବ ଆଥଲେଟମାନଙ୍କୁ ପ୍ରତିବନ୍ଧକ ଭାଙ୍ଗିବା ସହ ବିଶ୍ୱସ୍ତରରେ ସ୍ୱୀକୃତି ହାସଲ କରିବା ପାଇଁ ପ୍ରେତ୍ସାହିତ କରୁଛି। ଜାତୀୟ ଉତ୍କର୍ଷ କେନ୍ଦ୍ର, ଜଗତପୁରର ସଫଳତା ଏହି ପଦକ୍ଷେପଗୁଡ଼ିକର ସଫଳତାର ଏକ ଉଦାହରଣ, ଏହା ଏପରି ଏକ ତାଲିମ କେନ୍ଦ୍ର ଯେଉଁଠାରେ ପ୍ରତିଭାକୁ ପ୍ରୋତ୍ସାହନ ଦିଆଯାଏ ଓ ଚାମ୍ପିୟନମାନଙ୍କୁ ତିଆରି କରାଯାଏ ।ଦେଶକୁ ଗୌରବାନ୍ବିତ କରିବା ପାଇଁ ଜଗତପୁରସ୍ଥିତ ଜାତୀୟ ଉତ୍କର୍ଷ କେନ୍ଦ୍ରର ପ୍ରଶିକ୍ଷକ, କର୍ମଚାରୀ ଓ କ୍ରୀଡ଼ାବିତଙ୍କ ଉଦ୍ୟମକୁ ରାଷ୍ଟ୍ରମନ୍ତ୍ରୀ ଶ୍ରୀମତୀ ଖଡ଼ସେ ପ୍ରଶଂସା କରିଥିଲେ। କେନ୍ଦ୍ର ଯୁବ ବ୍ୟାପାର ଏବଂ କ୍ରୀଡ଼ା ମନ୍ତ୍ରଣାଳୟ ଆମ ଆଥଲେଟମାନଙ୍କୁ ବିଶ୍ୱସ୍ତରୀୟ ସୁବିଧା, ଭିତ୍ତିଭୂମି ଏବଂ ସହାୟତା ପ୍ରଦାନ କରିବାକୁ ପ୍ରତିଶ୍ରୁତିବଦ୍ଧ ବୋଲି ସେ ଦୋହରାଇଥିଲେ ।