ନୂଆଦିଲ୍ଲୀ: ଆମେରିକାର ନବନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶପଥ ଗ୍ରହଣ ଉତ୍ସବରେ ଯୋଗ ଦେବା ପାଇଁ ବୈଦେଶିକ ବ୍ୟାପାର ମନ୍ତ୍ରୀ ଡକ୍ଟର ଏସ୍ ଜୟଶଙ୍କର ଆମେରିକା ଗସ୍ତରେ ଯିବେ । ଆସନ୍ତା ୨୦ ତାରିଖରେ ଆମେରିକାର ୪୭ତମ ରାଷ୍ଟ୍ରପତିଙ୍କ ଶପଥ ଗ୍ରହଣ ଉତ୍ସବରେ ସେ ଭାରତ ସରକାରଙ୍କ ପ୍ରତିନିଧିତ୍ୱ କରିବେ। ଯଦିଓ ଆମେରିକାର ଶପଥ ଗ୍ରହଣ ସମାରୋହକୁ ବିଶ୍ୱ ନେତାମାନଙ୍କୁ ନିମନ୍ତ୍ରଣ କରାଯାଏ ନାହିଁ, ଏଥର ନିୟମ ପରିବର୍ତ୍ତନ କରାଯାଉଛି। ପ୍ରଧାନମନ୍ତ୍ରୀ ମୋଦୀ ଶପଥ ଗ୍ରହଣ ଉତ୍ସବରେ ଯୋଗ ଦେଇପାରନ୍ତି ବୋଲି କଳ୍ପନାଜଳ୍ପନା କରାଯାଉଥିଲା, କିନ୍ତୁ ମୋଦୀଙ୍କ ବଦଳରେ ଜୟଶଙ୍କର ଯିବେ | ତେବେ ମୋଦୀ କାହିଁକି ଯୋଗ ଦେବେ ନାହିଁ, ତାହାକୁ ନେଇ ଚର୍ଚ୍ଚା ଜୋର ଧରିଛି |ସୂତ୍ରରୁ ମିଳିଥିବା ସୂଚନା ମୁତାବକ ବୈଦେଶିକ ମନ୍ତ୍ରାଳୟର ଲକ୍ଷ୍ୟ ହେଉଛି ଆମେରିକାର ଉଭୟ ଦଳ, ଡେମୋକ୍ରାଟିକ୍ ଏବଂ ରିପବ୍ଲିକାନ୍ ସହିତ ସମାନ ସମ୍ପର୍କ ବଜାୟ ରଖିବା। ଭାରତ ସର୍ବଦା ନିଶ୍ଚିତ କରିଆସିଛି ଯେ ଆମେରିକା ସହିତ ଏହାର ସମ୍ପର୍କ କୌଣସି ଗୋଟିଏ ରାଜନୈତିକ ଦଳ ମଧ୍ୟରେ ସୀମିତ ନୁହେଁ। ଯଦିଓ ପ୍ରଧାନମନ୍ତ୍ରୀ ମୋଦୀଙ୍କ ଟ୍ରମ୍ପଙ୍କ ସହ ଭଲ ବନ୍ଧୁତା ଅଛି, ଭାରତ ତାର କୂଟନୈତିକ ସନ୍ତୁଳନ ବଜାୟ ରଖିବାକୁ ଚାହୁଁଛି। ନେତାମାନଙ୍କ ବିଷୟରେ କହିବାକୁ ଗଲେ, ସବୁଠାରୁ ଆଶ୍ଚର୍ଯ୍ୟଜନକ ନାମ ହେଉଛି ସି ଜିନପିଙ୍ଗଙ୍କ ନାମ । ସେହିପରି ଇଟାଲୀ ପ୍ରଧାନମନ୍ତ୍ରୀ ଜିଓର୍ଜିଆ ମେଲୋନି, ୟୁକ୍ରେନ ରାଷ୍ଟ୍ରପତି ଜେଲେନ୍ସକିଙ୍କ ଭଳି ନେତା ଶପଥ ଗ୍ରହଣ ଉତ୍ସବରେ ଯୋଗଦେବେ। ଶପଥ ଗ୍ରହଣ ଉତ୍ସବରେ ବିଶ୍ୱର ପ୍ରାୟ ୮୦ ଜଣ ରାଜନେତା ଯୋଗ ଦେଇପାରନ୍ତି। ଗଣମାଧ୍ୟମ ରିପୋର୍ଟ ଅନୁସାରେ, ପାକିସ୍ତାନ ଏବଂ ବାଂଲାଦେଶକୁ ନିମନ୍ତ୍ରଣ ଦିଆଯାଇନାହିଁ | ରୁଷ ରାଷ୍ଟ୍ରପତି ପୁଟିନଙ୍କୁ ମଧ୍ୟ ନିମନ୍ତ୍ରଣ କରାଯାଇ ନାହିଁ ।