ଚୌଦ୍ୱାର (ଶିବବ୍ରତ ଦାସ )ଟାଙ୍ଗୀ ଥାନା ଅନ୍ତର୍ଗତ ଟାଙ୍ଗୀ–କପିଳାସ ମୁଖ୍ୟରାସ୍ତାର ଭଗତପୁର ଛକ ନିକଟରେ ଥିବା ମା ତାରିଣୀ ମନ୍ଦିର ପାଖରେ ଏବେ ଦିନ ଦୁଇପହରରେ ଚାଲିଛି ନିଶା ବ୍ୟବସାୟର ଖୋଲା ଖେଳ। ଯେଉଁଠାରେ ପୂର୍ବରୁ ଧାର୍ମିକ ପରିବେଶ ଓ ଶାନ୍ତିର ପରିଚୟ ଥିଲା, ସେଠାରେ ଆଜି ଅସାମାଜିକ କାର୍ଯ୍ୟକଳାପର ଛାୟା ସ୍ପଷ୍ଟ ଭାବରେ ଦେଖାଯାଉଛି।
ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ, ଏଠାରେ ଗଞ୍ଜେଇ ଓ ଧଳା ଜହର ପର୍ଯ୍ୟନ୍ତ ବିଭିନ୍ନ ପ୍ରକାରର ନିଶା ସାମଗ୍ରୀ ଖୋଲାମଖୋଲି ବିକ୍ରି ହେଉଛି। ଏହି ଅବୈଧ ବ୍ୟବସାୟ ଏମିତି ଭାବେ ଚାଲୁଛି ଯେ, ମନେ ହେଉଛି ଏହା ଏକ ସଂଗଠିତ ନେଟୱର୍କ ଦ୍ୱାରା ପରିଚାଳିତ। ଆଇନ ଓ ଶୃଙ୍ଖଳା ବ୍ୟବସ୍ଥା ଥିବା ସତ୍ତ୍ୱେ ଏହିପରି କାରବାର ଖୋଲା ଆକାଶ ତଳେ ଚାଲିବା ଘଟଣା ସାଧାରଣ ଲୋକଙ୍କ ମନରେ ଅନେକ ପ୍ରଶ୍ନ ଉଠାଉଛି।
ଏହାର ସବୁଠାରୁ ଗମ୍ଭୀର ପ୍ରଭାବ ପଡ଼ୁଛି ରାସ୍ତା ସୁରକ୍ଷା ଉପରେ। ନିକଟସ୍ଥ ସିମେଣ୍ଟ କମ୍ପାନୀ (ଓ.ସି.ଏଲ୍)ରୁ ଲୋଡ୍ ନେଇ ଆସୁଥିବା ଭାରୀ ଯାନ ଚାଳକମାନେ ଏଠାରୁ ନିଶା ସାମଗ୍ରୀ କିଣି ସେବନ କରୁଥିବା ଅଭିଯୋଗ ଆସୁଛି। ନିଶାଗ୍ରସ୍ତ ଅବସ୍ଥାରେ ଯାନ ଚାଳନା କରିବାରୁ ପ୍ରତିଦିନ ଦୁର୍ଘଟଣାର ଝୁମ୍କି ବଢ଼ୁଛି। ଅନେକ ମୂଲ୍ୟବାନ ଜୀବନ ହାରାଇବା ସହିତ ଅନେକ ପରିବାର ଅପୂରଣୀୟ କ୍ଷତିର ସମ୍ମୁଖୀନ ହେଉଛନ୍ତି। ଏପରି ସ୍ଥିତିରେ ସବୁଠାରୁ ଅଧିକ ଚିନ୍ତାଜନକ ହେଉଛି ଯୁବ ପୀଢ଼ିର ଭବିଷ୍ୟତ୍। ନିଶା ସେବନରେ ଯୁବମାନେ ଆକୃଷ୍ଟ ହେଉଥିବାରୁ ସମାଜର ମୂଳ ଗଠନ ଦୁର୍ବଳ ହେଉଛି। ଏହାର ପ୍ରଭାବ ସରାସରି ପରିବାର ଉପରେ ପଡ଼ୁଛି—ଘରେ ଅଶାନ୍ତି, ଆର୍ଥିକ ସମସ୍ୟା, ଓ ସମ୍ପର୍କର ଭଙ୍ଗୁରତା ବଢ଼ୁଛି।
ସ୍ଥାନୀୟ ମହିଳାମାନେ ଏହି ପରିସ୍ଥିତି ପ୍ରତି ଗଭୀର ଅସନ୍ତୋଷ ପ୍ରକାଶ କରିଛନ୍ତି। ସେମାନେ ପୁନଃପୁନି ପ୍ରଶାସନଙ୍କ ନଜରକୁ ଏହି ମାମଲା ଆଣିଥିଲେ ମଧ୍ୟ, ଏପର୍ଯ୍ୟନ୍ତ କୌଣସି ଦୃଢ଼ ପଦକ୍ଷେପ ନେଇଯାଇନାହିଁ ବୋଲି ଅଭିଯୋଗ କରିଛନ୍ତି। ଏହା ଫଳରେ ସାଧାରଣ ଲୋକଙ୍କ ମନରେ ପ୍ରଶାସନ ପ୍ରତି ଅବିଶ୍ୱାସ ଦିନକୁ ଦିନ ବଢ଼ୁଛି।
ଏପରି ସ୍ଥିତିରେ ପ୍ରଶ୍ନ ଉଠୁଛି—ଏହି ଅବୈଧ ନିଶା ବ୍ୟବସାୟ କାହାର ଆଶ୍ରୟରେ ଚାଲିଛି? ଆଇନ ପ୍ରୟୋଗ କରିବାର ଦାୟିତ୍ୱ ଥିବା ବ୍ୟବସ୍ଥା କାହିଁକି ନିରବ? ସମାଜକୁ ଧ୍ୱଂସ ଦିଗରେ ନେଉଥିବା ଏହି କାରବାର ଉପରେ କେବେ ଲଗାମ ପଡ଼ିବ? ସ୍ଥାନୀୟ ବାସିନ୍ଦାମାନେ ଏବେ ଦୃଢ଼ ସ୍ୱରରେ ଦାବି କରୁଛନ୍ତି ଯେ, ଏହି ଅଞ୍ଚଳରେ ଚାଲୁଥିବା ନିଶା ବ୍ୟବସାୟ ଉପରେ ତୁରନ୍ତ କଡ଼ା କାର୍ଯ୍ୟାନୁଷ୍ଠାନ ନିଆଯାଉ। ନିୟମିତ ଚେକିଂ, ଦୋଷୀଙ୍କୁ ଗିରଫ ଓ ଆଇନୁସାରେ ଦଣ୍ଡ—ଏହି ସବୁ ପଦକ୍ଷେପ ନିଆଯିବା ଆବଶ୍ୟକ।
ନଚେତ୍, ଆଜି ଯାହା ଏକ ସ୍ଥାନୀୟ ସମସ୍ୟା, କାଲି ସେହିଟା ଏକ ବଡ଼ ସାମାଜିକ ସଙ୍କଟର ରୂପ ନେଇପାରେ। ଆଉ ଏହାର ମୂଲ୍ୟ ଦେବାକୁ ପଡ଼ିବ ସାଧାରଣ ଲୋକଙ୍କୁ ଜୀବନରେ, ସମ୍ପତ୍ତିରେ ଓ ଭବିଷ୍ୟତରେ ।ଏବେ ଦେଖିବାକୁ ରହିଗଲା ପ୍ରଶାସନ କେବେଜାଗିବ, ନାଁକି ଏହି ନିଶା ସାମ୍ରାଜ୍ୟ ଆଉ ବଢ଼ିଚାଲିବ?