ଚୌଦ୍ୱାର (ଶିବବ୍ରତ ଦାସ ) ଟାଙ୍ଗୀ-ଚୌଦ୍ୱାର ବ୍ଲକରେ ସୋମବାର ଦେଖିବାକୁ ମିଳିଲା ଏକ ଅଜବ ଚିତ୍ର—କାମ କରିବା ପାଇଁ ଯେ କଲମ, ସେହି କଲମକୁ ଆଜି ପକାଇଦେଲେ କର୍ମଚାରୀମାନେ। କାରଣ? ଅଭିଯୋଗ ହେଉଛି, ବିଜେପି ଦଳର କିଛି ଆତ୍ମଘୋଷିତ ନେତାଙ୍କ “ଗୁଣ୍ଡାରାଜ” ଏବେ ବ୍ଲକ ଅଫିସରେ ନୂଆ ନିୟମ ଲେଖୁଛି!
“କଲମ ଛାଡ ଆନ୍ଦୋଳନ” ନାମରେ କର୍ମଚାରୀମାନେ ଶାନ୍ତିପୂର୍ଣ୍ଣ ଭାବେ ପ୍ରତିବାଦ କଲେ, କିନ୍ତୁ ପ୍ରଶ୍ନ ହେଉଛି—ଏହି ଶାନ୍ତି କେବଳ କର୍ମଚାରୀଙ୍କ ପକ୍ଷରୁ ନା ଅନ୍ୟ ପକ୍ଷରୁ ନିରବତାର ନୂଆ ରଣନୀତି? ଏହି ଘଟଣାରେ ରାଜନୀତିକ ତାପମାତ୍ରା ବଢ଼ାଇବାକୁ ଦେର ହେଲା ନାହିଁ। ସାଲେପୁର ବିଧାୟକ ଘଟଣା ସ୍ଥଳରେ ପହଞ୍ଚି କର୍ମଚାରୀଙ୍କୁ “ନ୍ୟାୟ ମିଳିବ” ବୋଲି ଭରସା ଦେଲେ। କିନ୍ତୁ ଜନସାଧାରଣଙ୍କ ମନରେ ପ୍ରଶ୍ନ—ଏହା ସତ୍ୟରେ ନ୍ୟାୟର ପ୍ରତିଶ୍ରୁତି, ନା ଆଉ ଗୋଟିଏ ରାଜନୀତିକ ସଂଭାଷଣର ଆରମ୍ଭ? ସ୍ଥାନୀୟ ଲୋକମାନେ ଏବେ ପୋଲିସ ପ୍ରଶାସନଙ୍କୁ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରୁଛନ୍ତି। କାରଣ ଯଦି ଅଫିସ ଭିତରେ କଲମ ନିରବ ହେଉଛି, ତେବେ ବାହାରେ ଲୋକତନ୍ତ୍ର କେତେ ଉଚ୍ଚରେ କହିପାରିବ? “କଲମ ଛାଡିବାରେ ସମସ୍ୟା ସମାଧାନ ହେବ, ନା ଗୁଣ୍ଡାରାଜ ଆଉ ଗୋଟିଏ ଅଧ୍ୟାୟ ଲେଖିବ?”