ଧରାକୋଟ ( ଅମରେନ୍ଦ୍ର କୁମାର ପଟ୍ଟନାୟକ, ଗଞ୍ଜାମ ଜିଲ୍ଲା ପ୍ରତିନିଧି ଓଡ଼ିଶା ଟୁଡେ): ଧରାକୋଟ ଥାନା ଅନ୍ତର୍ଗତ ଖାରିଗୁମା ଗ୍ରାମରେ ଗତ ରବିବାର ଦିନ ଗୋ ଚାଲାଣ କରୁଥିବା ଅଭିଯୋଗରେ ସିଙ୍ଗିପୁର ଗ୍ରାମର ଦୁଇଜଣ ବ୍ୟକ୍ତି ବାବୁଲା ନାୟକ ଓ ବୁଲୁ ନାୟକ କୁ ଗୋ ରକ୍ଷକ ନାମକ ସଂଗଠନର କିଛି ବ୍ୟକ୍ତି ଅଟକାଇବା ସହ ସେମାନଙ୍କ ଠାରୁ ବେଆଇନ ଭାବେ ଅର୍ଥ ଦାବୀ କରିଥିଲେ। ଏଥିରେ ବାବୁଲା ଓ ବୁଲୁ ଅକ୍ଷମତା ପ୍ରକାଶ ପରେ ସେମାନେ ଜବରଦସ୍ତ ଦୁଇ ଜଣ ଙ୍କୁ ବାରିକ ଦ୍ଵାରା ଅଧା ଲଣ୍ଡା କରାଇବା ସହ ଖାରିଗୁମା ଠାରୁ ଜାହାଡା ପର୍ଯ୍ୟନ୍ତ ମାଡ଼ ମାରି ଆଣିବା ପରେ ଜାହାଡା ଗାଁ ଦାଣ୍ଡରେ ଆଣ୍ଠେଇ ଚଲାଇବା ଏବଂ ପାଟିରେ ଘାସ ପୁରାଇ ନର୍ଦ୍ଦମା ପାଣି ପିଆଇବା ଅଭିଯୋଗ ଉଭୟେ ଧରାକୋଟ ଥାନାରେ କରିଥିଲେ । ଏ ସମ୍ପର୍କରେ ଧରାକୋଟ ଥାନାରେ ୨୪୦/୨୫ପ୍ରକାରେ ମାମଲା ରୁଜୁ କରି ପୋଲିସ ତଦନ୍ତକୁ ଆଗକୁ ବଢ଼ାଇବା ସହ ଏଥିରେ ଅଭିଯୁକ୍ତ ନଅ ଜଣଙ୍କୁ ଅଟକ ରଖିଛି। ଅନ୍ୟ ପକ୍ଷରେ ପୀଡ଼ିତ ଦୁଇ ଜଣ ବ୍ୟକ୍ତି ଙ୍କୁ ମେଡିକାଲ ଚିକିତ୍ସା ପରେ ସୁରକ୍ଷିତ ଭାବରେ ସେମାନଙ୍କ ଗାଁ ସିଙ୍ଗିପୁର ରେ ପୋଲିସ ଛାଡ଼ିଛି। ଘଟଣା ସମ୍ପର୍କରେ ଥାନା ଅଧିକାରି ଚନ୍ଦ୍ରିକା ସ୍ବାଇଁ ଙ୍କ ସହ ଯୋଗାଯୋଗ ବେଳେ ଏହି ଘଟଣାରେ ୧୪/୧୫ ଜଣ ସଂପୃକ୍ତ ଥିବା ସନ୍ଦେହ କରାଯାଉଛି । ଗୋ ରକ୍ଷକ ନାମରେ ବେଆଇନ ଭାବେ ଅର୍ଥ ଆଦାୟ କରିବା ଓ ଆଇନକୁ ହାତକୁ ନେବା ବ୍ୟକ୍ତି ମାନଙ୍କୁ ଆଦୌ ବରଦାସ୍ତ କରାଯିବ ନାହିଁ । ଏଥିରେ ସଂପୃକ୍ତ ଅନ୍ୟାନ୍ୟ ଅଭିଯୁକ୍ତ ମାନଙ୍କୁ ଗିରଫ ପାଇଁ ପୋଲିସ ଉଦ୍ୟମ ଜାରି ରଖିଥିବା ସେ ପ୍ରକାଶ କରିଛନ୍ତି। ସମ୍ବେଦନଶିଳ ଏହି ଘଟଣାର ତଦନ୍ତ ଭାର ଆସିକା ଉପଖଣ୍ଡ ପୋଲିସ ଅଧିକାରୀ ନେଇଥିବା ବେଳେ ଏହି ଘଟଣା ଧରାକୋଟ ଅଞ୍ଚଳରେ ଆଲୋଡନ ସୃଷ୍ଟି କରିଛି ।