ଭଞ୍ଜନଗର,୦୯ /୦୫ (ଅମରେନ୍ଦ୍ର କୁମାର ପଟ୍ଟନାୟକ, ଦକ୍ଷିଣାଞ୍ଚଳ ସ୍ଵତନ୍ତ୍ର ପ୍ରତିନିଧି, ଓଡ଼ିଶା ଟୁଡେ): ଗଞ୍ଜାମ ଜିଲା ଭଞ୍ଜନଗର ଠାକୁରାଣୀ ଯାତ୍ରାରେ ଦିନକୁ ଦିନ ଅସମ୍ଭାଳ ଭିଡ ହେଉଛି ଦେବୀଙ୍କ ଦର୍ଶନ ପାଇଁ। ଶନିବାର ଦେବୀଙ୍କ ଦର୍ଶନ, ସାଂସ୍କୃତିକ କାର୍ଯ୍ୟକ୍ରମ ସମେତ ମୀନାବଜାରର ମଜା ନେବାପାଇଁ ପ୍ରାୟ ୫୦ ହଜାରରୁ ଊର୍ଦ୍ଧ୍ୱ ଭକ୍ତଙ୍କ ସମାଗମ ହୋଇଥିଲା। ଭିଡ଼କୁ ଦେଖି ପୋଲିସ ପକ୍ଷର ମଧ୍ୟ ଆବଶ୍ୟକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା । ଶନିବାର ରାତି ୮ ଟାରେ ଦେବୀ ଅସ୍ଥାୟୀ ମଣ୍ଡପରୁ ପୂର୍ବ ମୁଖା ହୋଇ ବାହାରିବା ପରେ ଟାଉନ୍ ହଲ୍ ଛକ ପର୍ଯ୍ୟନ୍ତ ଯାଇଥିଲେ। ସେଠାରୁ ପଶ୍ଚିମ ମୁଖା ହୋଇ ପୂରୁଣା ବଜାର ସାହି ଛକ ପର୍ଯ୍ୟନ୍ତ ଆସିଥିଲେ। ସେଠାରୁ ସୁବୁଦ୍ଧି ସାହି, ବାଟାଗଳି, ଚିରଞ୍ଜିବୀ ପଟ୍ଟନାୟକ ସାହି, ତେଲି ସାହି, ରଥ ସାହି, ଭଞ୍ଜ ମାର୍ଗ ହୋଇ ମୁଖ୍ୟ ସଡ଼କକୁ ଦେବୀ ବାହାରିଥିଲେ। ଏହାପରେ ପଶ୍ଚିମ ମୁଖା ହୋଇ ଦେବୀ ବିଳମ୍ବିତ ରାତିରେ ଅସ୍ଥାୟୀ ମଣ୍ଡପରେ ପହଞ୍ଚି ଵିଶ୍ରାମ ନେଇଥିଲେ । ଏହି ସମୟରେ ପାରମ୍ପରିକ ନୃତ୍ୟ ମଧ୍ୟରେ ଦେବୀଙ୍କ ନଗର ଭ୍ରମଣ ହୋଇଥିଲା। ଅପରପକ୍ଷେ ଆଜି ରାତିରେ କବିସମ୍ରାଟ ରଙ୍ଗମଞ୍ଚ ରେ ଦେଶରେ ଖ୍ୟାତି ଅର୍ଜନ କରିଥିବା କଣ୍ଠଶିଳ୍ପୀ ବର୍ଣାଳୀ ହୋତା ଏବଂ ତାଙ୍କ ଟିମ୍ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ। ସାଂସ୍କୃତିକ କାର୍ଯ୍ୟକ୍ରମ ଦେଖିବାକୁ ପ୍ରବଳ ଭିଡ ହୋଇଥିଲା । ବର୍ଣାଳୀଙ୍କ ‘ଉଠ କଙ୍କାଳ’ ଗୀତରେ ଦର୍ଶକଙ୍କ ମନରେ ଶିହରଣ ଭରି ଦେଇଥିଲା । ରବିବାର ଦେବୀଙ୍କ ନଗର ଭ୍ରମଣ ରେଡକ୍ରସ ରୋଡ, ଉପ ଜିଲ୍ଲାପାଳ ବାସଭବନ ହୋଇ ମୁଖ୍ୟ ସଡକ ପର୍ଯ୍ୟନ୍ତ ଅଛି।