ଚୌଦ୍ୱାର(ଶିବବ୍ରତ ଦାସ ): ଚୌଦ୍ୱାର ପୌରପାଳିକାରେ ଦୀର୍ଘ ଦିନ ହେବ ଲାଗି ରହିଥିବା ଅଧ୍ୟକ୍ଷା ଓ ଉପାଧ୍ୟକ୍ଷଙ୍କ ମଧ୍ୟରେ ବିବାଦ ଏବେ ଚରମ ସୀମାରେ ପହଞ୍ଚିଛି। ଦୁଇ ପ୍ରମୁଖ ଜନପ୍ରତିନିଧିଙ୍କ ମଧ୍ୟରେ ଚାଲିଥିବା ଏହି ଶୀତଳ ଯୁଦ୍ଧ ଓ ଗୋଷ୍ଠୀ କନ୍ଦଳ ଆଗାମୀ ଦିନରେ ଚୌଦ୍ୱାର ସହରର ବିକାଶକୁ ସମ୍ପୂର୍ଣ୍ଣ ରସାତଳକୁ ନେଇଯିବ କି, ସେ ନେଇ ଏବେ ସ୍ଥାନୀୟ ଅଞ୍ଚଳରେ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି।ବିକାଶ କାର୍ଯ୍ୟରେ ବାଧା ରାଜନୈତିକ ସର୍ବସ୍ୱତା ଏବଂ ବ୍ୟକ୍ତିଗତ ଆଧିପତ୍ୟ ବିସ୍ତାରକୁ ନେଇ ଦୁଇ ଗୋଷ୍ଠୀ ମଧ୍ୟରେ ଟଣାଓଟରା ଲାଗି ରହିଛି। ଏହା ଯୋଗୁଁ ପୌରପାଳିକାର ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଅଧାରେ ଅଟକି ରହିଛି। ସହରର ବିଭିନ୍ନ ୱାର୍ଡରେ ରାସ୍ତାଘାଟ ନିର୍ମାଣ, ପାନୀୟ ଜଳ ଯୋଗାଣ ଏବଂ ଆଲୋକୀକରଣ ଭଳି ଜରୁରୀକାଳୀନ କାର୍ଯ୍ୟ ବାଧାପ୍ରାପ୍ତ ହେଉଥିବା ଅଭିଯୋଗ ହେଉଛି। ଉଭୟ ନେତା ନିଜ ନିଜ ଜିଦ୍ରେ ଅଟଳ ରହିଥିବାରୁ କାଉନସିଲ୍ ବୈଠକଗୁଡ଼ିକ ମଧ୍ୟ ସରଗରମ ଓ ଅଶାନ୍ତ ହେଉଛି।ଜନସାଧାରଣଙ୍କ ମଧ୍ୟରେ ଅସନ୍ତୋଷ ନେତାଙ୍କ ମଧ୍ୟରେ ଚାଲିଥିବା ଏହି ଆଭ୍ୟନ୍ତରୀଣ କଳହ ଯୋଗୁଁ ସାଧାରଣ ଲୋକେ ନାହିଁ ନଥିବା ସମସ୍ୟାର ସମ୍ମୁଖୀନ ହେଉଛନ୍ତି। ପୌରପାଳିକାକୁ ବିଭିନ୍ନ ପ୍ରମାଣପତ୍ର ଓ ସରକାରୀ ସହାୟତା ପାଇଁ ଆସୁଥିବା ଲୋକମାନେ ନିରାଶ ହୋଇ ଫେରୁଛନ୍ତି। “ଆମେ ଆମର ମୌଳିକ ସମସ୍ୟାର ସମାଧାନ ପାଇଁ ଭୋଟ ଦେଇଥିଲୁ, ନେତାଙ୍କ ବ୍ୟକ୍ତିଗତ ଲଢ଼େଇ ଦେଖିବାକୁ ନୁହେଁ” ବୋଲି ଜଣେ ସ୍ଥାନୀୟ ବାସିନ୍ଦା କ୍ଷୋଭର ସହ ପ୍ରକାଶ କରିଛନ୍ତି।ବିବାଦର ସିଧାସଳଖ ପ୍ରଭାବ ସହରର ପରିମଳ ବ୍ୟବସ୍ଥା ଉପରେ ପଡ଼ିଛି। ଅନେକ ସ୍ଥାନରେ ଆବର୍ଜନା ସଫା ହେଉ ନଥିବାରୁ ଦୁର୍ଗନ୍ଧମୟ ପରିବେଶ ସୃଷ୍ଟି ହେଉଛି। ସହରବାସୀ ଏବେ ସ୍ୱାସ୍ଥ୍ୟଗତ ସମସ୍ୟା ଭୋଗିବା ଆରମ୍ଭ କଲେଣି। ଯଦି ତୁରନ୍ତ ଉଭୟ ନେତାଙ୍କ ମଧ୍ୟରେ ବୁଝାମଣା ନହୁଏ, ତେବେ ଚୌଦ୍ୱାରର ସୁନାମ ଧୂଳିସାତ ହେବା ସହ ବିକାଶର ଗତି ସମ୍ପୂର୍ଣ୍ଣ ସ୍ଥାଣୁ ହୋଇଯିବ ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି।