ପ୍ରଧାନମନ୍ତ୍ରୀ ଆବାସ ଯୋଜନା – ଗ୍ରାମୀଣ
ନୂଆଦିଲ୍ଲୀ : ପ୍ରଧାନମନ୍ତ୍ରୀ ଆବାସ ଯୋଜନା – ଗ୍ରାମୀଣ (ପିଏମଏୱାଇ – ଗ୍ରାମୀଣ) ସମାଜର ଗରିବ ବର୍ଗଙ୍କୁ ଘର ଯୋଗାଇଦେବା ଲକ୍ଷ୍ୟ ରଖି ୨୦ ନଭେମ୍ବର ୨୦୧୬ରେ ଆରମ୍ଭ ହୋଇଥିଲା । ଏଥିରେ ହିତାଧିକାରୀ ଚୟନ ଏକ କଠୋର ତିନି ସ୍ତରୀୟ ବୈଧତା ପ୍ରକ୍ରିୟା ଯଥା: ସାମାଜିକ-ଆର୍ଥିକ ଜାତିଗତ ଜନଗଣନା (ଏସଇସିସି ୨୦୧୧) ଏବଂ ଆବାସ+ (୨୦୧୮) ସର୍ଭେ, ଗ୍ରାମସଭା ଅନୁମୋଦନ, ଏବଂ ଜିଓ-ଟ୍ୟାଗିଂ ମାଧ୍ୟମରେ କରାଯାଏ। ଯେପରି ସବୁଠାରୁ ଯୋଗ୍ୟ ବ୍ୟକ୍ତିଙ୍କ ପାଖରେ ସହାୟତା ପହଞ୍ଚିବ ଏହି ଯୋଜନା ତାହା ସୁନିଶ୍ଚିତ କରେ । ଏହି ଯୋଜନାରେ ଦକ୍ଷ ପାଣ୍ଠି ବିତରଣ ପାଇଁ ଆଇଟି ଏବଂ ପ୍ରତ୍ୟକ୍ଷ ଲାଭ ହସ୍ତାନ୍ତର (ଡିବିଟି) ବ୍ୟବସ୍ଥାକୁ ଅନ୍ତର୍ଭୁକ୍ତ କରାଯାଇଛି। ଏହା ବ୍ୟତୀତ ବିଭିନ୍ନ ନିର୍ମାଣ ପର୍ଯ୍ୟାୟରେ ଜିଓ-ଟ୍ୟାଗ୍ ହୋଇଥିବା ଫଟୋ ମାଧ୍ୟମରେ ଅଞ୍ଚଳ ଭିତ୍ତିକ ଆବାସ ଡିଜାଇନ୍ ଏବଂ ପ୍ରମାଣ ଭିତ୍ତିକ ତଦାରଖ କାର୍ଯ୍ୟକାରୀ କରାଯାଇଛି ।
ପ୍ରଥମେ ୨୦୨୩-୨୪ ସୁଦ୍ଧା ୨.୯୫ କୋଟି ଗୃହ ନିର୍ମାଣ କରିବାକୁ ଲକ୍ଷ୍ୟ ରଖାଯାଇଥିବା ବେଳେ ୨୦୨୪-୨୯ ଆର୍ଥିକ ବର୍ଷ ପାଇଁ ମୋଟ ୩,୦୬,୧୩୭ କୋଟି ଟଙ୍କା ଏବଂ ୨୦୨୪-୨୫ ଆର୍ଥିକ ବର୍ଷ ପାଇଁ ୫୪,୫୦୦ କୋଟି ଟଙ୍କାର ବ୍ୟୟବରାଦ ସହିତ ଏହି ଯୋଜନାକୁ ଆହୁରି ୨ କୋଟି ଘର ସହିତ ବୃଦ୍ଧି କରାଯାଇଛି।ଅଗଷ୍ଟ ୯, ୨୦୨୪ରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ସମତଳ ଅଞ୍ଚଳରେ ବର୍ତ୍ତମାନର ୟୁନିଟ୍ ସହାୟତାରେ ୨ କୋଟି ଘର ଏବଂ ଉତ୍ତର ପୂର୍ବାଞ୍ଚଳ ରାଜ୍ୟ ଏବଂ ହିମାଚଳ ପ୍ରଦେଶ ଉତ୍ତରାଖଣ୍ଡ, କେନ୍ଦ୍ରଶାସିତ ଅଞ୍ଚଳ ଜାମ୍ମୁ-କାଶ୍ମୀର ଏବଂ ଲଦାଖ ପାହାଡ଼ିଆ ରାଜ୍ୟ ଗୁଡ଼ିକରେ ୧.୩୦ ଲକ୍ଷ ଟଙ୍କାର ୟୁନିଟ୍ ସହାୟତାରେ ଆଉ ଦୁଇ କୋଟି ଘର ନିର୍ମାଣ ପାଇଁ ଆର୍ଥିକ ସହାୟତା ପ୍ରଦାନ ପ୍ରସ୍ତାବକୁ ଅନୁମୋଦନ ମିଳିଥିଲା ।
ଆବେଦନ ପ୍ରକ୍ରିୟା
ପିଏମଏୱାଇ-ଜି ଅଧୀନରେ ସୁବିଧା ପାଇବାକୁ ହେଲେ ହିତାଧିକାରୀଙ୍କୁ ଏକ ସରଳ ଅନଲାଇନ ପଞ୍ଜୀକରଣ ପ୍ରକ୍ରିୟା ଦେଇ ଯିବାକୁ ପଡିବ: https://web.umang.gov.in/landing/department/pmayg.html
ପିଏମଏୱାଇ-ଜି ଅଧୀନରେ ଅଗ୍ରଗତି:
ପ୍ରଧାନମନ୍ତ୍ରୀ ଆବାସ ଯୋଜନା- ଗ୍ରାମୀଣ (ପିଏମଏୱାଇ-ଜି) ଅଧୀନରେ କେନ୍ଦ୍ର ସରକାର ୩.୩୨ କୋଟି ଘର ନିର୍ମାଣ ପାଇଁ ଏକ ମହତ୍ୱାକାଂକ୍ଷୀ ଲକ୍ଷ୍ୟ ଧାର୍ଯ୍ୟ କରିଛନ୍ତି । ନଭେମ୍ବର ୧୯, ୨୦୨୪ ସୁଦ୍ଧା ୩.୨୧ କୋଟି ଘର ମଞ୍ଜୁର ହୋଇଛି ଏବଂ ୨.୬୭ କୋଟି ଘର ନିର୍ମାଣ ସମ୍ପୂର୍ଣ୍ଣ ହୋଇଛି, ଯାହା ଲକ୍ଷ ଲକ୍ଷ ଗ୍ରାମୀଣ ପରିବାରର ଜୀବନଧାରଣ ସ୍ଥିତିରେ ଉଲ୍ଲେଖନୀୟ ଉନ୍ନତି ଆଣିଛି।ଏହି ଯୋଜନାରେ ମହିଳା ସଶକ୍ତୀକରଣ ଉପରେ ବିଶେଷ ଗୁରୁତ୍ୱ ଦିଆଯାଇଛି, ମଞ୍ଜୁରୀପ୍ରାପ୍ତ ଘରର ୭୪% କେବଳ କିମ୍ବା ମିଳିତ ଭାବେ ମହିଳାଙ୍କ ମାଲିକାନାରେ ରହିଛି । ଏହି ଯୋଜନାରେ ଏବେ ମହିଳାଙ୍କୁ ଶତ ପ୍ରତିଶତ ମାଲିକାନା ପ୍ରଦାନ କରିବାକୁ ଲକ୍ଷ୍ୟ ରଖାଯାଇଛି। କୁଶଳୀ ନିଯୁକ୍ତିକୁ ମଧ୍ୟ ପ୍ରାଥମିକତା ଦିଆଯାଇଛି, ପ୍ରାୟ ୩ ଲକ୍ଷ ଗ୍ରାମୀଣ ରାଜମିସ୍ତ୍ରୀଙ୍କୁ ବିପର୍ଯ୍ୟୟ ମୁକାବିଲା ନିର୍ମାଣରେ ତାଲିମ ଦିଆଯାଇଛି, ଯାହା ସେମାନଙ୍କ ନିଯୁକ୍ତି କ୍ଷମତାକୁ ବୃଦ୍ଧି କରୁଛି ।ଆହୁରି ୨ କୋଟି ପରିବାର ପାଇଁ ଘର ନିର୍ମାଣ ହେଲେ ପାଖାପାଖି ୧୦ କୋଟି ଲୋକ ଉପକୃତ ହେବେ ବୋଲି ଆଶା କରାଯାଉଛି। ଏହି ଅନୁମୋଦନ ଦ୍ୱାରା ବାସଗୃହ ବିହୀନ ସମସ୍ତ ଲୋକ ଏବଂ ଜରାଜୀର୍ଣ୍ଣ ଓ କଚ୍ଚା ଘରେ ରହୁଥିବା ଲୋକଙ୍କ ପାଇଁ ସମସ୍ତ ମୌଳିକ ସୁବିଧା ସହିତ ଉତ୍ତମ ମାନର ସୁରକ୍ଷିତ ଏବଂ ସୁରକ୍ଷିତ ଗୃହ ନିର୍ମାଣ ସହଜ ହେବ । ଏହା ଦ୍ୱାରା ହିତାଧିକାରୀଙ୍କ ସୁରକ୍ଷା, ସ୍ୱଚ୍ଛତା ଏବଂ ସାମାଜିକ ସମାବେଶ ସୁନିଶ୍ଚିତ ହେବ ।