ଭୁବନେଶ୍ବର: ଓଡ଼ିଆ ସଂସ୍କୃତ ପଣ୍ଡିତ ତଥା ଆନ୍ଧ୍ରପ୍ରଦେଶର ତିରୁପତିସ୍ଥିତ ଜାତୀୟ ସଂସ୍କୃତ ବିଶ୍ୱବିଦ୍ୟାଳୟର ଆସୋସିଏଟ ପ୍ରଫେସର ସୋମନାଥ ଦାଶ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ମହାକାବ୍ୟ ଲେଖିଛନ୍ତି। ଗଞ୍ଜାମ ଜିଲ୍ଲାର ସଂସ୍କୃତ ବିଦ୍ୱାନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଜୀବନୀ ଏବଂ କାର୍ଯ୍ୟ ଉପରେ ସଂସ୍କୃତ ଭାଷାରେ ଏହି ‘ମହାକାବ୍ୟ’ ରଚନା କରିଛନ୍ତି। ସେ ଏହି ମହାକାବ୍ୟକୁ ୭୦୦ ପୃଷ୍ଠାରେ ବର୍ଣ୍ଣନା କରିଛନ୍ତି। ଶ୍ରୀ ଦାଶଙ୍କ ଦ୍ୱାରା ରଚିତ ଏବଂ ଗୁଜରାଟର ଭେରାବଲର ସୋମନାଥ ସଂସ୍କୃତ ବିଶ୍ୱବିଦ୍ୟାଳୟ ଦ୍ୱାରା ପ୍ରକାଶିତ ପୁସ୍ତକ ‘ନରେନ୍ଦ୍ର ଆରୋହଣମ୍’ ଗତ ସପ୍ତାହରେ ଭେରାବଲରେ ଅନୁଷ୍ଠିତ ଏକ ଯୁବ ମହୋତ୍ସବରେ ଉନ୍ମୋଚିତ ହୋଇଥିଲା ।
ଏହି ପୁସ୍ତକରେ ୧୨ଟି ଅଧ୍ୟାୟରେ ୧୨୦୦ଟି ଶ୍ଲୋକ ରହିଛି। ଏହା ଉଭୟ ଇଂରାଜୀ ଏବଂ ହିନ୍ଦୀରେ ବର୍ଣ୍ଣନା କରାଯାଇଛି। ଏଥିରେ ମୋଦୀଙ୍କ ଜୀବନ ଯାତ୍ରା, ତାଙ୍କ ପିଲାଦିନର କାର୍ଯ୍ୟକଳାପ, ଗୁଜରାଟର ମୁଖ୍ୟମନ୍ତ୍ରୀ ଭାବରେ ଏବଂ ଦ୍ବିତୀୟ ଥର ପ୍ରଧାନମନ୍ତ୍ରୀ ଯାଏଁ ସବୁ କିଛି ବର୍ଣ୍ଣନା କରାଯାଇଛି ।ଏନେଇ ସୋମନାଥ ଦାଶ କହିଛନ୍ତି, “ଗୁଜରାଟର ଏକ ସାଧାରଣ ପରିବାରରେ ଜନ୍ମଗ୍ରହଣ କରିଥିବା ମୋଦୀ ତାଙ୍କ ଜୀବନରେ ଅନେକ ଉତ୍ଥାନ-ପତନ ଦେଖିଛନ୍ତି ଏବଂ ଆଜିକାଲି ବିଶ୍ୱର ସମସ୍ତ ଯୁବପିଢ଼ିଙ୍କ ପାଇଁ ଜଣେ ଆଦର୍ଶ ପାଲଟିଛନ୍ତି। ତାଙ୍କର ତପସ୍ୱୀ ରାଜନୈତିକ ଯାତ୍ରା ଏବଂ ଜୀବନର ସଂଘର୍ଷ ସର୍ବଦା ଇତିହାସରେ ଲିପିବଦ୍ଧ ରହିବ। ତେଣୁ ମୁଁ ଏପରି ଜଣେ ବ୍ୟକ୍ତିତ୍ୱଙ୍କ ଜୀବନ ଏବଂ କାର୍ଯ୍ୟକୁ ସଂସ୍କୃତରେ ଲେଖିବାକୁ ନିଷ୍ପତ୍ତି ନେଇଥିଲି ।
ମୁଁ ମୋଦୀଙ୍କୁ କେବେ ଭେଟିନାହିଁ। କିନ୍ତୁ ବିଭିନ୍ନ ପୁସ୍ତକ, ପତ୍ରିକା, ତାଙ୍କର ଅଭିଭାଷଣ ଏବଂ ମନ କି ବାତ୍ ଶୁଣି ତଥ୍ୟ ସଂଗ୍ରହ କରିଛି।ସୂଚନାଯୋଗ୍ୟ, ପ୍ରୋଫେସର ସୋମନାଥ ଦାଶଙ୍କୁ ଏହି ପୁସ୍ତକ ସମାପ୍ତ କରିବା ପାଇଁ ୪ ବର୍ଷରୁ ଅଧିକ ସମୟ ଲାଗିଥିଲା। ଏଥିରେ ଅନେକ ବିଦ୍ବାନ ବ୍ୟକ୍ତି ମଧ୍ୟ ନିଜର ମତ ଦେଇଛନ୍ତି।