ଚୌଦ୍ଵାର (ଶିବବ୍ରତ ଦାସ): ସ୍ୱାଧୀନ ଦେଶରେ ମହିଳା ସୁରକ୍ଷା ପ୍ରସଙ୍ଗରେ ପୁନର୍ବାର ଗଭୀର ପ୍ରଶ୍ନ ସୃଷ୍ଟି କରିଛି ଟାଙ୍ଗୀ ଅଞ୍ଚଳର ଏକ ଲଜ୍ଜାଜନକ ଘଟଣା। ଅନ୍ଧାର ରାତିର ନିରବତାକୁ ସାକ୍ଷୀ କରି ଜଣେ ନାବାଳିକାଙ୍କ ସହ ହୋଇଥିବା ଅସଭ୍ୟ ଓ ଅମାନବୀୟ ବ୍ୟବହାର ସମାଜର ନୈତିକ ପତନକୁ ପ୍ରକାଶ କରିଛି। ସୂଚନାନୁସାରେ, ନାବାଳିକା ଜଣକ କୌଣସି କାର୍ଯ୍ୟ ସାରି ଘରକୁ ଫେରୁଥିବା ସମୟରେ ଟାଙ୍ଗୀ ଥାନା ଅନ୍ତର୍ଗତ କନ୍ଦରକଣା ଅଞ୍ଚଳର ମହେଶ୍ୱର ପଣ୍ଡା ଓରଫ କାହ୍ନା (୨୮) ଓ କଏରାପାରି ଅଞ୍ଚଳର ସିବା ବେହେରା (୩୪) ତାଙ୍କୁ ରାସ୍ତାରେ ଅଟକାଇଥିଲେ। ଅଭିଯୋଗ ଅନୁଯାୟୀ, ସେମାନେ ତାଙ୍କ ପୋଷାକ ଓ ହାତ ଟାଣି ଦୁର୍ବ୍ୟବହାର କରିବା ସହ ଘଟଣାର ଭିଡିଓ ଧାରଣ କରି ତାହାକୁ ସୋସିଆଲ ମିଡିଆରେ ଭାଇରାଲ କରିବାର ଧମକ ଦେଇଥିଲେ। ଏହି ଘଟଣା କେବଳ ଏକ ରାତିର ଆକସ୍ମିକ ଅପରାଧ ନୁହେଁ; ଅଭିଯୋଗ ଅନୁସାରେ ପୂର୍ବରୁ ମଧ୍ୟ ଫୋନ ମାଧ୍ୟମରେ ଅଶ୍ଳୀଳ କଥାବାର୍ତ୍ତା କରି ଅବୈଧ ସମ୍ପର୍କ ପାଇଁ ଚାପ ପ୍ରୟୋଗ କରୁଥିଲେ। ଅଶ୍ଳୀଳ ଫଟୋ ଭାଇରାଲ କରିବା ଓ ନାବାଳିକାଙ୍କ ମୋବାଇଲ ନମ୍ବର ଅନ୍ୟମାନଙ୍କ ସହ ସେୟାର କରି ତାଙ୍କ ଚରିତ୍ର ନଷ୍ଟ କରିବାକୁ ଚେଷ୍ଟା ହୋଇଥିବା ଅଭିଯୋଗ ମଧ୍ୟ ସାମ୍ନାକୁ ଆସିଛି। ନାବାଳିକା ଜଣକ ସାହସ ସଂଗ୍ରହ କରି ଟାଙ୍ଗୀ ଥାନାର ଦ୍ୱାରସ୍ଥ ହୋଇ ଲିଖିତ ଅଭିଯୋଗ ଦାଖଲ କରିବା ପରେ ଥାନା ଅଧିକାରୀ ବିକାଶ କୁମାର ସେଠୀ ଘଟଣାକୁ ଗୁରୁତ୍ୱ ସହକାରେ ଗ୍ରହଣ କରି ତଦନ୍ତ ଆରମ୍ଭ କରିଥିଲେ। ପ୍ରାଥମିକ ତଦନ୍ତ ପରେ ଦୁଇ ଅଭିଯୁକ୍ତଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଥିବା ସୂଚନା ମିଳିଛି। ପୋଲିସର ଏହି ତ୍ୱରିତ ପଦକ୍ଷେପ ସ୍ୱାଗତଯୋଗ୍ୟ ହେଲେମଧ୍ୟ, ଘଟଣାଟି ସମାଜରେ ମହିଳା ଓ କନ୍ୟାମାନଙ୍କ ସୁରକ୍ଷା ପ୍ରତି ଅବହେଳାକୁ ପୁନଃ ଉଜାଗର କରିଛି। ଅଞ୍ଚଳବାସୀଙ୍କ ମନରେ ମୂଳ ପ୍ରଶ୍ନ! ସ୍ୱାଧୀନ ଦେଶରେ ଏକ ନାବାଳିକା କେବେ ନିର୍ଭୟରେ ରାସ୍ତା ଚାଲିପାରିବ? କାନୁନ ଓ ଶାସନ ବ୍ୟବସ୍ଥା କଠୋର ହେଉଥିବା ସତ୍ୱେ ଯଦି ମନୋଭାବର ପରିବର୍ତ୍ତନ ନ ଆସେ, ତେବେ ଏପରି ଘଟଣା ପୁନରାବୃତ୍ତି ହେବାର ଆଶଙ୍କା ରହିବ। ଏହି ଘଟଣା କେବଳ ଏକ ଆଇନଗତ ମାମଲା ନୁହେଁ; ଏହା ସମାଜର ନୈତିକ ଚେତନା ପାଇଁ ଏକ ସତର୍କ ସଙ୍କେତ। ନାବାଳିକାଙ୍କ ସାହସ ଓ ଟାଙ୍ଗୀ ଥାନା ଅଧିକାରୀଙ୍କ ତ୍ୱରିତ କାର୍ଯ୍ୟାନୁଷ୍ଠାନ କୁ ଅଞ୍ଚଳବାସୀ ସ୍ବାଗତ କରିଛନ୍ତି।