ଚୌଦ୍ଵାର (ଶିବବ୍ରତ ଦାସ ): ଟାଙ୍ଗୀ ଥାନା ଅଞ୍ଚଳରୁ ପୁନର୍ବାର ଗୋଟିଏ ଦୁଃଖଦ ଏବଂ ଚିନ୍ତାଜନକ ଘଟଣା ସାମ୍ନାକୁ ଆସିଛି। ସହାୟତାର ନାମରେ ଆରମ୍ଭ ହୋଇଥିବା ଗୋଟିଏ ପରିଚୟ, କ୍ରମେ ଶୋଷଣର ଅଭିଯୋଗରେ ପରିଣତ ହୋଇଥିବାର ଖବର ମିଳିଛି।
ଅଭିଯୋଗ ଅନୁଯାୟୀ, ଯାଜପୁର ଜିଲ୍ଲା ବୈରୀ ଥାନା ଅନ୍ତର୍ଗତ ଛତିଆ ଅଞ୍ଚଳର ଭାଗ୍ୟଧର ସାମଲଙ୍କ ପୁଅ ବୁଲୁ ସାମଲ (୩୦), ରଞ୍ଜୁଲତା ମହାନ୍ତି ନାମକ ଜଣେ ମହିଳାଙ୍କୁ ସହାୟତା କରିବାର ନାମରେ ୨୦୨୪ ମସିହା ମାର୍ଚ୍ଚ ମାସରୁ ତାଙ୍କ ଇଚ୍ଛା ବିରୁଦ୍ଧରେ ବାରମ୍ବାର ଶାରୀରିକ ସମ୍ପର୍କ ରଖୁଥିବା ଅଭିଯୋଗ ହୋଇଛି।
ଏହି ଘଟଣା ସମ୍ପର୍କରେ ରଞ୍ଜୁଲତା ମହାନ୍ତି ଟାଙ୍ଗୀ ଥାନାରେ ଲିଖିତ ଅଭିଯୋଗ କରିବା ପରେ, ଟାଙ୍ଗୀ ଥାନାର ଅଧିକାରୀ ବିକାଶ କୁମାର ସେଠୀ ଘଟଣାକୁ ଗୁରୁତ୍ୱ ସହ କଣ୍ଡେଇ ତଦନ୍ତ ଆରମ୍ଭ କରିଥିଲେ। ପରବର୍ତ୍ତୀକାଳରେ ଅଭିଯୁକ୍ତ ବୁଲୁ ସାମଲଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ସୂଚନା ମିଳିଛି।
ଅନ୍ୟପକ୍ଷରେ, ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ବିଭିନ୍ନ ପ୍ରଶ୍ନ ଉଠୁଛି। ଯଦି ଘଟଣାଟି ୨୦୨୪ ମାର୍ଚ୍ଚ ଠାରୁ ଘଟୁଥିଲା, ତେବେ ଏତେ ଦିନ ପର୍ଯ୍ୟନ୍ତ ଅଭିଯୋଗ ଦାଖଲ କାହିଁକି ହେଲା ନାହିଁ—ଏହା ନେଇ ଲୋକମାନଙ୍କ ମଧ୍ୟରେ ଚର୍ଚ୍ଚା ଚାଲିଛି। ତଥାପି, ଏପରି ସମ୍ବେଦନଶୀଳ ମାମଲାରେ ସତ୍ୟ କ’ଣ, ତାହା କେବଳ ପୋଲିସର ସ୍ୱାଧୀନ ଏବଂ ନିଷ୍ପକ୍ଷ ତଦନ୍ତ ପରେ ହିଁ ସ୍ପଷ୍ଟ ହେବ।
ଏହି ଘଟଣା ପୁନର୍ବାର ସମାଜକୁ ଗୋଟିଏ ସ୍ପଷ୍ଟ ସନ୍ଦେଶ ଦେଉଛି—ସଚେତନତା ଓ ସତର୍କତା ହିଁ ଏପରି ପରିସ୍ଥିତିରୁ ରକ୍ଷା ପାଇବାର ଏକମାତ୍ର ଉପାୟ। ନହେଲେ, ଏଭଳି ଘଟଣା ଆଗାମୀଦିନରେ ଆଉ ଗୋଟିଏ କେସ ନମ୍ବର ଓ ଆଉ ଗୋଟିଏ କାହାଣୀ ଭାବେ ସାମ୍ନାକୁ ଆସିବାର ସମ୍ଭାବନାକୁ ନାକାରା କରାଯାଇପାରିବ ନାହିଁ।